Con pa domina bo emocion di jaloezie den pareha?

Sentimento di Jaloezie ta saludabel pa bo relacion?

Ta jaloers riba bo pareha no necesariamente ta significa algo malo of ta malo pa bo relacion.

Ora e ta controla y expresa den un forma saludabel y trankil, e por resulta hasta den crecemento di bo relacion. Jaloezie ta un sentimento natural cu no facilmente bo por elimina for di bo sistema. Hopi biaha nos kier ta e persona mas principal pa nos pareha. Nos kier pa nos pareha tin wowo solamente pa nos. Bo kier pa bo pareha duna bo atencion mas tanto posibel. Tur esaki ta sentimentonan masha normal den un relacion di pareha.

Ta un persona jaloers y por controla e sentimento aki, ta un forma di demostra bo pareha cu bo no kier perde y cu bo ta sinti amor pe.

Na cua momento Jaloezie por ta peligroso?

Momento cu bo no por controla bo sentimento di Jaloezie e ta bira peligroso. Si bo no por reconoce e sentimento aki momento cu e presenta y no por domine bo ta un persona jaloers agresivo. Hopi persona ora nan bebe alcohol dimas, nan forma di ser ta cambia y e sentimento di jaloezie por dominanan y ta bira agresivo y hasta den cierto caso maltrata nan pareha. Tin persona mas jaloers cu otro, abo tin cu siña domina e sentimento aki. Hopi biaha un persona cu no ta sigur di su mes ta cay den e categoria di jaloers/agresivo.

Ora un relacion termina hopi persona no por biba cu e pensamento cu un otro persona tin chens di ta cu nan pareha y ta bira agresivo contra nan ex pareha y hopi biaha riba esun cu nan ta pensa cu nan ex pareha tin bista riba dje.

Con pa reconoce si bo pareha ta un persona jaloers/agresivo?

Si bo pareha constantemte ta corda bo cu bo ta di dje so y cu e ta menasa bo cu si bo caba relacion bo no lo ta pa niun otro hende.

Si bo pareha ta causa problema cu bo forma di bisti.

Den forma di "joke" e ta bisa bo cu e lo mata bo si e wak bo cu otro.

Cu tur biaha cu bo sali bo so, bo pareha ta rabia y bira agresivo.

Cu bo pareha mag di tin su amistad nan pero abo no.

Cu tur biaha e ta trece bo pasado padilanti y causa problema pa motibo di esey.

Cu e kier wak bo celular tur biaha y si e mira algo cu e no gusta e ta kibra bo celular of ta bira agresivo.

Cu e no tin confiansa den bo.

Si abo ta reconoce algun di e punto nan menciona den bo pareha ta tempo pa bo papia cu ne y busca ayudo profesional.

Semper ta bon pa bo reconoce e problema na tempo y atende cu ne.

Con pa domina bo emocion di Jaloezie?

-Reconoce cu bo ta un persona jaloers/agresivo y domina e sentimento aki

-Crea confiansa den bo mes

-Busca e origen di bo inseguridad

-Ta honesto cu bo pareha

-Crea confiansa den bo relacion

-Puntra bo mes di unda e sentimento di jaloezie ta sali

-Papia cu bo pareha riba bo sentimentonan di jaloezie