Personahe di siman.

​

Kiara Arends cu deseo ferviente pa logra algo grandi pa Aruba.

​

Kiara Arends, naci dia16 november 1998, a keda corono como nos Miss Universe Aruba 2022 recientemente. Tur cos a cuminsa 10 aña pasa, ora cu el a firma cu KOMA models, unda el a logra modela pa diferente marca local como tambe internacional. Na 2017 a coron’e como Miss Teen Aruba International y na 2018 el a sali Virreina Miss Teen Americas cu e titulonan di: best body, best dressed, best makeup y algun mas. Desde 4 aña di edad el a cuminsa practica natacion como tambe ballet, eherciendo e deportenan local como tambe internacional. Esaki a yud’e pa desaroya e habilidadnan di disciplina, determinacion y maneha su tempo y a fomenta e deseo pa Kiara logra algo grandi pa Aruba.

 

Na momento cu Kiara a termina VWO na 2017 el a haci un aña di Academic Foundation na Universidad di Aruba. Durante e aña ey el a representa Aruba na El Salvador como Miss Teen Americas y a logra conkista e titulo di 1st Runner Up. Na 2018 el a cuminsa studia ley y a termina su Bachelors Degree na 2021 na Universidad di Aruba. 

Na juni 2021 el a bay biba na Belgica pa e continua su estudio den International Business Trade and Tax Law na KU Leuven. Actualmente e ta skirbiendo su tesis, pa asina e logra su Master of Laws Degree. 

 

Kiara su meta di mas grandi aworaki ta, pa logra e titulo mayor di MISS UNIVERSE pa Aruba. Pero tambe e tin varios meta riba termino corto y largo plazo. Entre su metanan e tin pa motiva e mamanan hoben den necesidad, mediante su fundacion BUMP, cu tin como meta pa yuda e mamanan hoben logra nan soñonan y pa empodera nan pa tin un educacion den cualkier forma of area, pa finalmente nan aporta pa eleva e situacion social economico di nos pais.

Manera cu Kiara a conta den su speech dia di su coronacion, tur cos a cuminsa despues di un presentacion di Muchanan Sabi na Setar. Ivo Yanez a entrevist’e y el a bis’e cu un dia Kiara lo ta e prome Miss Universo pa Aruba. Kiara no tabata sa kico Ivo tabata kiermen cu esaki, te ora su tata a splic’e. For di eynan e deseo a nace.

Despues di termina su estudio den abogacia y participa na e certamen di Miss Universo, Kiara lo desea di amplia e plataforma di su fundacion BUMP. E lo desea di biaha rond di mundo, pa trece concientisacion riba e importancia di crea un fundeshi solido pa futuro: nos muchanan! Kiara ta kere cu su pasion y proposito den bida ta, pa yud’e hiba Aruba su nomber leu. 

 

Kiara ta bezig ta preparando su mes completamente pa e certamen di MISS UNIVERSE y ta train fisicamente bou di guia di Rene Wild, cu ta dun’e guia tanto den siman como tambe den weekend. Banda di esey Rene ta encarga tambe cu su plan di alimentacion nutritivo. Miss Universe ta buscando hende muher integral, p’esey ta importante pa Kiara keda altanto di e notificacionnan actual y formula su propio opinion riba diferente topico, cu ta relevante actualmente rond di mundo.

Mediante su dedicacion y determinacion el a logra yega di ta un hoben di 23 aña, cu un Bachelor Degree den ley, cu ta traha como modelo ful time, tin su propio fundacion, ta haci diferente trabou voluntario, a logra biaha diferente pais y a biba den exterior su so. Tur esaki ta tuma hopi esfuerzo y sacrificio, pero ta bale la pena, paso cada desafio a form’e y a hacie un persona firme para den su sapato.

Den su tempo liber e ta gusta scucha speech di motivacion, canta, baila y locual mas Kiara gusta ta biaha y conoce cultura nobo.

Kiara su conseho: “No tene miedo di e espacio entre bo soñonan y realidad, paso eynan ta unda e magia ta sosode. Kere den bo soñonan y no laga niun hende bisa bo cu bo no por logra nan. E persecucion di bo metanan ta e parti di mas bunita den ful bo bida. Si bo busca felicidad, semper lo bo encontr’e. Cada obstaculo den caminda ta un oportunidad pa bo avansa.”