E fin di siman aki ta tuma lugar e di 21 edicion di Soul Beach Music Festival.

Un weekend yena cu diferente actividad entre otro comedy night, 2 anochi di concierto, y diferente fiesta rond cu varios DJ. 

E prome actividad ta cuminsa awe cu e Block Party oficial di Soul Beach na South Beach Bar & Baru Lounge. 
Un anochi di fiesta cu entretenimiento di DJ E-Clazz, DJ Envy, DJ Outkast y DJ Diablo.

Diahuebs durante dia lo tin e Beach Party na Moomba Beach & cuminsando 4or di atardi lo tin e Happy Hour na poolside di Renaissance Wind Creek Aruba. 

E prome anochi di SBMF ta un anochi di comedia presenta pa Deon Cole & Tiffany Haddish cu lo tuma lugar diabierna na Renaissance Festival Plaza di 8 pa 10pm. 

E di dos anochi ta un anochi di concierto di The Roots & Anthony Hamilton.
E ultimo anochi tambe ta concierto di Jill Scott & Lucky Dave. 
Ambos concierto lo tuma lugar na Harbor Arena di 7 pa 11pm. 

Despues di e weekend aki lo culmina e temporada di SMBF ‘23 Dialuna 29 di Mei, cu e ‘Cool-down BBQ’ na Moomba Beach.

Ticket nan ta obtenibel ainda via pay.aw pa bo forma parti di e weekend aki. 

Esaki ta un evento unico y sigur hopi gusta, cu ta tuma lugar cada aña na Aruba y cu a wordo nombra como un di e miho celebracion nan den Caribe. 

Mas di 7 mil turista ta bishita nos isla durante e weekend di SBMF y ya caba por mira hopi turista presente.

Un experiencia cu sigur bo no por perde!

By: Zaynah Yanez

24/05/2023