Control y Regulacion di Remedinan na Aruba.

Inspectie Volksgezondheid Aruba (IVA) ta intensifica su esfuersonan pa garantisa uzo y benta sigur di remedinan riba nos isla. Segun inspector Roselynn Angela di IVA, regularmente nan ta hibando control den diferente lugarnan, manera fruterianan y supermercadonan, pa preveni benta ilegal di productonan medico.

Aña pasa, a drenta varios melding tocante e benta ilegal di remedinan, y boetnan ya a wordo imponi na negoshinan cu no ta cumpli cu e ley. E controlnan aki ta un parti di un esfuerso mas amplio, den colaboracion cu otro departamentonan di gobierno, pa introduci regulacion mas stricto.

Remedinan legal y su benta:
Di acuerdo cu ley, solamente algun tipo di remedi cu no ta di riesgo por ser bendi na supermarket. Remedinan mas fuerte por ser importa cu un permiso (vergunning) y mester ser bendi via botica. Boticanan ta autorisa pa surti e remedinan na pashent, bou control stricto.

Remedinan for di otro pais:
Si un persona a haya tratamento medico den exterior y kier trese su remedinan Aruba, esaki ta permiti solamente cu documentonan cu ta prueba esaki. Sinembargo, e tratamento mester sigui na Aruba, bou supervision di bo dokter, pa garantisa cu e tratamento ta continua manera mester ta. Dicon ta importante pa usa remedi solamente via bo dokter: bo dokter ta e unico persona cu por evalua bo situacion di salud di manera profesional y recomenda un remedi cu ta apropia pa bo sintomanan, dosificacion y duracion di uzo. Uzo di remedi sin recomendacion medico por tapa sintomanan, empeora bo situacion, of crea efectonan secundario serio. Tambe por causa complicacion si bo ta combina e remedi cu otro medicacion cu bo ya ta tumando.

Riesgo di benta ilegal:
Algun di e productonan medico ilegal cu a ser haya ta, entre otro:
•    Viagra y stimulantenan
•    Steroids
•    Remedinan pa cuero cu efecto secundario severo
•    Antibioticanan
•    Remedinan pa dolor (painkillers)

Uzo di e tipo di remedinan via canal ilegal, incluso online, ta implica riesgo pa salud publico, pasobra no tin garantia di su calidad, origen of manipulacion di su contenido.
Proteha bo salud. Consulta semper cu bo dokter di cas, y ricibi bo remedinan solamente via botica!