Na Aruba no tin suficiente caminda cu un persona por acudi cu problema mental.

​

Salud mental ta un topico cu hopi hende ta evadi pero cu ta hopi importante. 
Actualmente tin varios caso lamentabel ta tuma lugar na Aruba y mester reconoce cu den mayoria di e caso nan aki e origen ta problema mental. 
Sinembargo no tin suficiente atencion pa e problema aki como cu no tin suficiente instancia cu ta atende cu persona nan cu mas mester di esaki y e ta un caminda largo prome cu un persona por ricibi e ayudo necesario.
Hopi hende ta sufri di problema mental y nan no ta consciente y pa e motibo aki no ta buska atencion di un profesional tampoco. 

Tin varios tipo di problema mental entre otro depresion, ansiedad, bipolaridad, psicosis y schizofrenia. 

Na ki momento bo ta reconoce cu bo tin problema cu bo salud mental?
- Bo ta sinti cu constantemente bo ta down 
- Bo ta haya sentimento nan fuerte di rabia 
- Bo ta haya pensamento nan fuera di lo normal 
- Bo ta sinti cu constantemente bo ta preocupa y tin miedo 
- Bo ta sinti bo curpa malo y cansa 
- Bo ta ripara cambio drastico den bo apetit 
- Bo ta experiencia problema pa drumi 
- Bo ta ripara cambio extremo di humor
- Bo ta ripara cambio nan den bo conducta 
- Bo ta haya dificultad pa balansa bo actividad nan diario 
- Bo ta wak cambio den bo funcionamento y bo productividad
- Bo ta haya pensamento nan negativo pa hasi bo mes of otro daño 
- Bo ta haya pensamento di morto 
- Bo ta perde sinti di realidad 

Si abo ta experiencia algun di e sintoma nan aki cu por significa un problema den bo salud mental, acudi semper na bo docter di cas prome cu tur cos. 

E ta hopi importante pa un persona cu problema mental ricibi ayudo di un profesional pa por yega na e origen di e problema y pa si e persona ta rekeri medicamento pa e por bira miho e recibi esaki. 
Si abo ta sinti cu bo ta sufri di problema mental ta importante pa bo no neglisha esaki y si kisas bo conoce un persona cu ta sufri di problema mental semper purba dune conseho pa busca ayudo profesional.

Inversion den salud mental ta importante pa e persona como individuo y pa su aportacion den nos comunidad.