“Tin ora mi ta sinti di no kier ta na bida” E cantante Alejandro Sanz a confesa cu emocionalmente e no ta den su mihor momento. 

A traves di su red nan social e cantante di “Corazón Partió” y “Amiga Mía” a revela cu e ta pasando door di un ola di emocion cu a pone cuestiona hopi cos di su mes. 

E cantante di 54 aña a expresa via su cuenta di Twitter cu no ta tur ora e ta sinti bon y e la revela cu al contrario di locual fanatico nan ta kere, artista nan tambe ta di carni y weso. 
“Mi no ta bon. Mi ta tristo y cansa. 
Mi no sa si esaki ta yuda pa si tin algun persona cu ta pensa cu tur cos semper mester ta perfecto.” 

Durante su entrevista cu “El hormiguero” e la expresa e dilema sentimental cu e ta encontra su mes cune ultimamente. 
“Mi ta trahando duro pa surpasa tur esaki. Mi ta subi riba escenario y algo den mi lo bisami kico pa hasi pero tin momento cu mi no kier tey mes. Mi kier ta sincero. Mi sa cu tin mas hende cu ta sinti nan mes asina y si e ta yuda, ami ta sinti mesun cos.” 

Inmediatamente miles di fanatico a cuminsa mustra nan solidaridad na e artista, agradiciendo e artista pa genera felicidad por medio di su musica. 

Apesar di tur cos e cantante a afirma cu e no lo cancela su tour. 
Cu e guia corecto e lo saca su show dilanti y e no ta kere cu sera su mes ta e mihor solucion. 
E cantante iconico di Spaña a gradici tur su fanatico nan pa e apoyo, comprension y cariño cu e ta ricibi durante e momento delicado aki y por ultimo e la expresa cu e sa cu solo lo bolbe briya. 

Tur hende ta spera cu Alejandro recupera su estado di animo bek.