Isabella Noguera tin 22 aña di edad y e tin 3 aña bibando na Hulanda (Rotterdam). Actualmente Isabella ta den su ultimo fase di su Bachelor den International Business. Pues Isabella ta bezig su stage pa despues e cuminsa traha riba su thesis. Den weekend e ta traha na Hollister y ademas di esey Isabella ta voluntario (Vice President di ROCAS) cual ta e opvang commissie pa studiantenan Arubano di Rotterdam. Den Isabella su tempo liber e gusta sali baila cu amiganan, cushina, biaha y conoce lugar nobo sin laga afo Isabella gusta shop y haci yoga. Un di e logronan nan di mas grandi pa Isabella ta cu e la haal su propedeuse su prome aña.

​

Un di Isabella su otro logronan tabata cu e la haci su stage durante su di dos aña cu un compania cu yama "Otflow" y nan ta bende technologia pa mehora e condicion di transporte di fruta den container. E compania aki a duna Isabella e oportunidad di biaha bay Mexico y Costa Rica pa un business trip, durante e biahe nan aki Isabella a conoce y siña hopi, no solamente di e trabou pero di su mes tambe. Ademas di esey, Otflow a ofrece Isabella pa traha cu nan part-time ora cu e caba cu su stage pero Isabella tabata tin un part-time job caba na Hollister, pues esey kiermen cu Isabella tabata tin un epoca unda cu e tabata tin scol y dos part-time job. E tabata bay scol 3 biaha pa siman y traha 2 dia cu Otflow y den weekend e tabata traha na Hollister. Isabella a bisa nos cu definitivamente esaki no tabata facil pero e mester a haci hopi sacrificio, siña con pa maneha su tempo bon pero e tabata worth it pasobra e la crea amistad nobo y sin laga afo cu e la logra haal tur su cos nan di scol.

​

Isabella ta bezig cu su afstudeerstage cu e mesun compania Otflow, y nan dune e oportunidad di biaha cu nan atrobe, pero e biaha aki tabata pa participa den un evento unda nan a representa e compania na Alemania. Door di traha na Hollister Isabella tin mas confiansaora ta bin na papia cu hende y haci benta, dus esaki a yuda Isabella hopi durante e biahe pasobra e mester a haci e "sales pitch" di e compania y su coleganan a compliment e cu loke e la haci tabata super bon. Loke Isabella gusta mas di biba na Huland ta e lifestyle y e oportunidadnan cu e pais ta brinda bo como un studiante, tin asina hopi beneficio ora bo ta un studiante, un di nan ta cu bo por biaha gratis. 

​

Isabella su soño semper tabata pa biaha rond di mundo pa trabou sinembargo e ta contento cu e la logra esaki caba y esey ta dune mas gana pa sigui crece den su carera. Isabella su meta di mas grandi awo ta pa caba su estudio, haña un trabou cu e gusta, biaha lo mas cu e por y traha duru pa duna su mayornan bek tur loke nan a haci pe. Isabella a bisa cu e ta wak su mes ta bay Aruba algun dia bek, pero no pa awo e ta sinti cu e ta mucho jong y mundo ta asina grandi y e kier probecha y haci lo mas cu e por mientras cu e ta biba na Europa. Eventualmente e lo kier bay Aruba bek pa settle down, cumpra un cas y biba "Dushi".  Isabella a mencionca cu un di e cos nan mas dificil di biba manera un studiante na Hulanda ta leu di bo cas y famia. Un di e otro cosnan cu ta haci biba na Hulanda mas dificil ta e clima manera tur hende ta bisa, pero eventualmente bo ta custuma y bo ta siña aprecia locual bo tin. Por ehempel, na Aruba bo ta celebra ora cu awa yobe y en cambio, na Hulanda bo ta celebra ora tin solo. 

​

Isabella su conseho pa e personanan cu tin pensa di bay hulanda sea pa studia of traha, ta haci bo research bon! Awendia  bo por haña tur cos riba internet y esaki ta haci e preparashon hopi mas facil. Tambe corda cu e cambio no ta bay ta facil y si bo mester di ayudo no tene miedo pa reach out, bo no ta bo so. Isabella a recomenda tambe prome cu bo bay Hulanda haci trabou voluntario of zorg bo tin suficiente experencia di trabou pasobra esaki lo yuda bo haña un bon trabou na Hulanda. Ora di bay biba na Hulanda, lo mas importante ta papone un meta bo dilanti y haci bo best pa logre, hasta si tin obstaculo riba bo caminda pasobra esey ta forma parti di e experencia y ta laga bo crece mane persona .Zorg pa bo tin un 'support system" cu tambe kier bay dilanti, y asina boso ta motiva y yuda otro. Finalmente Isabella su ultimo conseho ta pa sigui bo soñonan y traha duru pa e bida cu bo lo kier tin, pero no lubida di enjoy bida y have fun. 

​

​

​

​