Un pastor cristian na Mexico ta birando viral door di proclama cu e ta bendiendo parcelanan den shelo na 100 dollar pa meter cuadra.

​

E pastor ta confirma cu na 2017, Dios a dune autorisacion pa bende e parcelanan celestial aki, garantisando su cumpradonan di ricibi un tereno serca di e palijs di Dios independientemente dje tamaño di e parcela.

Un flyer di e pastor cu ta circula rond, tin e detayenan dje compra. Entre otro e flyer ta mustra un cas di clase medio den shelo y un famia cu cuatro miembro subiendo shelo via trapinan color oro yegando nan tereno den shelo.
Tin diferente medionan pa hasi pago, entre otro cu Visa, Masterdard, Google Pay, American Express y Apple Pay y hasta tin areglo di pago disponibel.

Un influencer di TikTok a confirma cu ja caba a  ser bendi miyones di dollar cu e parcelanan eterno aki. E ta yame "e negoshi mayor di Real Estate riba planeta". 
Desafortunadamente, esaki no ta e prome caso di un hende cu ta purba di bende bienes celestial. Na 2018, un pastor zimbabuense a ser deteni despues di a bende "tickets pa bai shelo" na 533 dollar pa persona. Di e mesun manera, aña pasa un pastor ugandés a convense su sigidornan pa nan bende tur nan bienesnan terenal pa asina inverti den compranan celestial eterno.

Kizas un dia e estafadornan aki lo realisa cu acceso na shelo ta gratis!