Personahe di siman:

Zoary van Putten un hoben emprendedora den cuido di cabey na Hulanda.

Zoary van Putten (24) ta naci na e dushi isla di Aruba. El a bay biba na Hulanda na aña 2008, unda el a haci su estudio di “huidtherapie”. Actualmente e tin su mesun negoshi como educador y specialista den cabey: wavy, krul y Afro na Hulanda y parcialmente na Aruba. Aparte di ta un entrepreneur, Zoary ta mama, pareha, amiga, ruman y yiu. 
Zoary gusta musica masha hopi mes. El a lanta ta scucha musica di top nivel hunto cu su tata y welo. Su tata semper a apoya esaki. Su mayornan a pone den les di guitara, canto, musica y piano. E no a siña toca e instrumentonan aki bon, pero e ta purbando di dedica awor mas tempo. 

Zoary su negoshi yama “ Doctor Curlz”. Doctor Curlz ta focus riba salud, cuido y educacion tocante bo cuero di cabes y bo cabey krul. Door di su estudio di terapia di cuero, el a siña e aspecto medico di nos cuero y cabey, cual e ta implementa den tur e tratamentonan cu e ta ofrece. 
E atmosfera di su salon ta hopi ‘peace-full’; holor di yerba natural, soul music y un safe space pa tur persona cu tin cabey wavy, krul y Afro. Zoary a bisa su meta ta, pa guia bo pa aprecia y compronde bo cabey, mientras bo por sinti bo relaha, comfortabel y acepta. 
Doctor Curlz a nace como un humilde idea di por yuda mas tanto hende posibel, cu no ta aprecia of sa con pa cuida nan cabey krul. Y e meta aki semper Zoary ta lucha pa logra na un manera mas natural y facil posibel. 

For di chikito Zoary a lanta ta cuida su cabey den un forma mas natural posibel, danki na su mama y su tanchinan. Na grandi el a continua ta haci esaki y asina el a cuminsa ofrece e tratamento aki como un servicio. Na 2018 Zoary a cuminsa cu su servicio den su studio di studiante na Den Haag. Despues di 1 aña el a muda bay Rotterdam. Awor, 4 aña despues, e tin un curly hair spa salon hunto cu su team. 

Zoary su intencion ta pa bay biba bek na Aruba, door di e libertad mental y paz, cu uno ta sinti na Aruba y cu definitivamente niun otro lugar por ofrec’e esaki. E kier pa su yiu tambe lanta ta aprecia naturalesa, e cosnan simpel y valioso den bida. Zoary kier siña mas di nos cultura, ta cerca di su famia y inculca den su yiu, nos balornan. 

Zoary su deseo pa aki 10 aña ta, pa su situacion financiero no ta uno mas di cuestion di sobrevivi, sino uno unda e por disfruta bida hunto cu su yiu, pareha y famia. 

Su conseho: 
“Tuma tempo pa conoce bo mes. Sali for di e “box” y habri bo wowo pa tur posibilidad. Purba diferente cos, pa bo sa kico bo ta gusta y den kico tur bo tin talento. Stop di limita of compara bo mes. Uza otro su experencia- y logronan como inspiracion y crea semper algo nobo cu otro hende no ta haci. “Stay original, there’s only you”. Semper puntra bo mes: “Kico ami por aporta, pa por haci un diferencia?”Keda semper fiel y honesto na bo mes y den tur situacion cu bo mester por enfrenta. Pensa den grandi ta hopi bon! Esey ta laga nos sigui padilanti, pero no lubida, cu abo tin cu pone e prome stap, pa por yega eynan algun dia”.