Ta investigando morto di un baby di 2 aña door di maltrato y abuso sexual.

​

Tin un consternacion enorme na Chía, Cundinamarca, pa un presunto caso di maltrato fisico y abuso sexual di un baby di apenas 2 aña, cu a fayece diaranson anochi na un clinica di Bogota, Colombia, a pesar di tur e esfuersonan medico haci pa salba su bida. E baby a fayece debi na golpinan brutal ricibi y ta presumi cu tambe nan a abusa di dje sexualmente. Tur cos a pasa, ora cu e mama a hiba e baby cerca un familiar pa nan cuid’e, mientras cu e mama mester a bay traha na un centro di beyesa di Chía. Den e oranan di atardi riba e mesun dia, e persona aki a yama e mama pa bis’e, cu e baby ta grave y cu ta transportando e baby cu urgencia pa un centro medico. Sinembargo ora e mama a yega e clinica, e dokternan a indica cu nan haci tur cos pa trata di salba e baby, pero no a logra, debi na e trauma cu e criatura a pasa aden. Autoridad concerni awor ta na encargo di e investigacion, pa determina si e baby a ricibi maltrato fisico y abuso sexual, como tambe identifica e persona cu tabata na encargo di e cuido di e baby y si tabatin mas persona na e lugar di e suceso.