Raibiently Mercalina determina pa sigui cu su soño den baseball profesional y estudio na Hulanda.

Raibiently Mercalina, (21), un hoben di Aruba, cu ta profesional den baseball y ta bibando na Hulanda, desde 2020. Prome cu el a bay biba na Hulanda, e tabata contracto cu e team di baseball “Philadelphia Phillies” y den e temporada di Covid, nan a lag’e bay. Despues di un par di siman Raibiently a tuma e decision, pa bay Hulanda pa sigui hunga baseball y studia. 
Actualmente e ta trahando tambe part-time na Act of Fade Barberstudio y ta studiando Sport & Bewegen na Roc Mondriaan niveau 4. 
Raibiently a expresa, cu loke mas e ta gusta di Hulanda ta, cu tin hopi mas oportunidad di siña cos nobo, si abo mes kier y tur cos ta hopi mas structura na Hulanda. 
Na comienso Raibiently mester a adapta basta y esey tabata un poco desafiante, pero e aña aki e ta sinti mihor y su baseball ta bayendo bon tambe cu su 2 prome temporadanan.
Su meta e aña aki ta, pa logra caba cu su temporada di baseball mihor cu el a cuminsa cu ne y tambe p’e bay bon na scol y conoce algun lugar mas den Europa. 
E parti mas dificil pa Raibiently di biba na Hulanda ta winter, ora no tin solo y awa ta yobe y toch bo mester sali di cas bay traha of bay scol. 
Su meta di mas grandi ta, pa e ta un inspiracion pa otro hende y specialmente pa nos muchanan. Finalmente Raibiently a indica tambe, cu e no ta wak su mes ta bay biba na Aruba pa awor. 

Su conseho: “Pa e hobennan cu ta bayendo pa un etapa nobo na Hulanda, percura bo regel tur cos na tempo, manera; cas y pa bay cu un meta. No bay djis paso un amiga/o a bisa bo cu Hulanda ta dushi. Sigui bo soñonan y cu hopi determinacion bo lo logra.”