Alviana Arends un hoben Arubiano studiando psicologia na Hulanda cu pasion pa trece mas aceptacion y conscientisacion pa salud mental.

​

Alviana Arends, (22), ta un hoben Arubiano studiando Toegepaste Psychologie na Hogeschool Leiden na Hulanda. Cu pasion pa trece mas aceptacion y conscientisacion rond di e tema di salud mental, el a lansa un campaña pa esaki, considerando cu september tambe ta luna di “suicide prevention and awareness month”. 

​

Na honor di e luna di prevencion y conscientisacion di suicidio e ta yegando su fin, nos ta desea di honra e bidanan perdi causa door di suicdio y e batayanan silencioso cu asina tanto ta sigui bringa cu ne. E luna aki mester ta un recordatorio di e importancia di combersacionnan habri sin sosten y empatia.

​

E luna aki ta corda nos cu retonan di salud mental no ta manifesta semper mes un cos. "High-functioning depression" por tapa dolor profundo, haciendo e mas dificil p'e persona pidi yudansa, hopi biaha ta door cu nan ta sinti cu nan no ta ‘merece’ esaki como cu nan ta logra ainda pa pasa door di emocionnan di bida. Pero funciona no ta nifica prospera, e no ta nifica cu e dolor ta menos real.

​

E compromiso pa conscientisa, ofrece sosten y mustra compacion ta extende mas leu cu e luna aki. Nos mester reconoce cu ta posibel pa tin victimanan sufriendo silenciosamente. Door di yega cerca, 'check in' y crea un espacio safe pa combersacion. Nos por yuda esunnan cu ta sinti nan mes isola pa nan realisa cu nan no mester bringa nan so.

​

Bo historia no a caba ainda, pa esunnan cu ta sinti nan mes abruma pa scuridad, ta crucial pa sa cu semper tin speransa, hasta den e momentonan di mas dificil y cu ningun di nos ta nos so den e biahe aki. Tin speransa, yudansa y sanacion den cada dia nobo.

Huntu nos por zorg pa niun hende no sinti nan mes nan so den nan momentonan di mas scur. Yega papia y laga nos ta e luz pa otro.

Laga nos hiba e lesnan y concientisacion di e luna aki dilanti, treciendo luz riba salud mental henter aña. Rindiendo homenahe na e individuonan, famia y comunidadnan cu a ser impacta door di sigui bringa pa un futuro unda menos hende ta sinti nan mes isola y mas ta haya e yudansa cu nan mester. Hunto nos por ta e luz cu ta yuda otronan den nan momentonan di mas scur.

 

​

​