Listen Live !

Watch Live !

Gerlien Croes ta nos politico di siman "Aruba ta anhela pa un cambio, mester di un cambio urgente".

Team Ivo 4 Life durante campaña electoral 2024 lo entrevista diferente politico den nos seccion "Politico di siman". Awe nos team a entrevista Mr. Gerlien Croes como e prome politico den nos seccion pa eleccion 2024.

Nomber completo y fecha di nacemento?
Gerlien Luzdiane Croes
7 di februari 1987

- Conta nos un tiki di bo infancia, cua scol bo a bay, hobby y kico tabata e prome funcion cu bo kier a eherce tempo bo tabata chikito?
E prome scol cu mi a bishita tawata Prinses Margriet School, (awendia Airco Iris Kleuterschool) y despues como basisschool Reina Beatrix y sigui pa Colegio Arubano. Semper mi a gusta musica; mi tawata activo den baile, ballet, canto y hasta actividad di teatro. Di chikito mi a pensa pa bira juffrouw di scol.

- Na unda bo a studia y con e experiencia di ta studiante tawata pa bo y cua ta e diplomanan cu bo a logra?
Mi a cuminsa cu un HBO international business na Hulanda den oranan di mainta y den oranan di anochi mi tabata hasi mi VWO. Na e momento cu mi a finalisa mi VWO mi a realisa tambe cu mi kier a cambia di studie. Asina mi a scohe pa continua di biaha cu mi Bachelor den Ley Internacional Europeo na Haagse Hogeschool. Despues mi a sigui y finalisa cu mi Masters den Globalisacion y Ley cu specialisacion den Ley Internacional di Economia na Universidad di Maastricht. Mi ta titula como Meester in de Rechten. E experiencia como studiante na Hulanda tawata un di e miho etapanan den mi bida. Mi a biba na Rotterdam y tawata biaha tur dia pa bay scol. No solamente e bida di studiante a siña mi confronta bida independientemente, pero tambe a siña mi con grandi mundo y oportunidad den bida ta y a corda mi cu nunca nos mester limita nos mes.

- Con bo a drenta politica? Pakico bo a scoge partido AVP pa ta prome partido pa eleccion? Cuanto voto bo a haya den bo prome salida? Y pakico bo ta pensa cu asina hopi hende a deposita nan confiansa den bo?
Semper mi a pensa cu un dia den bida mi lo haci mi entrada den politica, vocifera pa pueblo y esnan cu tin mester defensa, pero mi frustracion a bira mas grandi ora mi a bolbe bek Aruba y mi tawata wak cu hopi cos por wordo cambia y cu pueblo merece un miho representacion. Na 2017 Partido AVP a aserca mi y e tempo ey ainda mi por a reconoce mi mes den e pensamentonan di e partido, aunke ya mi tawata tin algun preocupacion, pero cu e promesa cu e partido lo haci un cambio drastico di rejuvenece e partido y cu e amor pa mi pais, mi a tuma e stap hopi mas trempan cu mi a pensa, pa drenta den politica.

Den mi prome salida mi a ricibi 982 voto di sosten na number 18 riba e lista. Mi ta sinti cu pueblo tawata aprecia cu mi a trece un cambio den e forma di comunica y hiba politica, cu mas contenido y no atake personal.

By: Zaynah Yanez

25 september 2024

- Kico bo a logra como parlamentario? Ta dificil logra pasa ley cu abo a para su tras mientras cu ta den oposicion?
Mi prome periodo como parlamentario no tawata esun di mas facil. No solamente pa pasa un ley of un mocion como oposicion ta un reto, pero hasta para pa lo corecto y bay contra mi mesun (ex) partido a desenboca den mi salida di partido AVP, y sigur para pa lo corecto den mi representacion dignamente y no partidista no ta algo usual den parlamento di Aruba.

- Como hende muher bo ta wordo trata diferente den parlamento pa bo coleganan?
No solamente den parlamento, pero den politica en general, ser femenino y alabes di un edad relativamente hoben, hopi bes nan ta "onderschat" of no duna bo e respet manera debe ser.

- Con bo ta haya cu e nivel di e reunionnan den parlamento ta bay y kico abo lo cambia?
Ta un lastima pa mira e nivel di reunionnan di parlamento, esey ta un di e decepcionnan di mas grandi. Incluso mandatario y e prome Minister di Aruba, no tin respet pa e organo di mas halto y su miembronan.
Lastimamente mi no por cambia e pensamento of mentalidad of forma di hiba politica di otro politiconan, solamente nos por spera cu e dia por yega cu nan mes ta dicidi di cambia e manera aki. Lo mas importante ta pa mi sigura cu ami ta keda eherce mi trabou debidamente.

- Pakico bo a laga partido AVP? Tawata un decision facil?
Pa para pa lo corecto y para contra corupcion administrativo.

Mas y mas mi tawata comparti mi preocupacionnan internamente. 6 aña largo di situacion cu no por continua asina den e organisacion, pero a escala mucho mas momento cu a bin tratamento di un ley di un contract cu a wordo cera pa un ex Minister di Turismo di partido MEP y despues a resulta cu partido AVP mes a didici di exonera e persona aki di tur responsabilidad, esta Sr. Briesen y lag’e "get away" cu e hecho aki cu awe ta costa pueblo 2 miyon florin. Partido no a informa mi persona y otro colega debidamente di locual realmente a sosode y na final e situacion aki a escala di tal forma cu no por a yega na otro mas.
Mi a para pa Aruba y mi a para pa lo corecto. Mi a para contra corupcion administrativo.

- Con yama bo partido nobo? Kico ta locual bo kier logra cu bo partido nobo?
E partido yama FUTURO. Sigur un cambio den e forma di hiba politica, pero mas aun cu e speransa cu por logra haci un impacto real pa comunidad di Aruba door di haya e oportunidad cu su miembronan lo bira representante di pueblo. Y si yega na e oportunidad, haci varios cambio di maneho cu realmente lo sirbi na beneficio di nos comunidad.

- Tin algun ley of punto specifico cu bo kier traha riba dje un bes bo ta den gobierno?
Ley di supervision financiero cu Hulanda y sigur cambio den leynan di belasting - entre otro "uni" algun ley pa cu heffingnan di impuesto y introduci pakete di incentivo fiscal pa inversionista.

- Cua ta e reto di mas dificil cu bo a pasa den bo carera politico?
E politica interno den partido por ta mas cruel cu esunan di bo opositornan. Ningun reto ta mas facil of dificil cu otro. Por wak e reto of por semper wak e oportunidadnan cu ta sali for di e retonan aki.

- Bo partido lo traha cu tur otro partido si yega asina leu di forma gobierno?
Na bienestar general di Aruba, nos lo ta habri pa papia cu tur, a base di pensamento y puntonan en comun. Lo mester identifica posibilidad of no pa cooperacion di trabou na bienestar di Aruba.

- Con lo bo hiba bo campaña y si bo por a cambia algo den nos sistema electoral, cua esaki lo ta?
Continua na purba comparti mas contenido posibel. Ideal un dia yega na 2 eleccion: uno parlamentario y uno pa mandatario.

- Ta dificil haya hoben pa drenta den politica?
Sigur e no ta facil. E forma di hiba politica te ainda no ta hacie atractivo tampoco. Ohala cu mas y mas hoben por wordo inspira y realisa cu tanten nos no "step-up" hunto, nos no lo haya e cambionan desea.

- Cua ta e reto di mas grandi cu e siguiente gobierno ta enfrenta cu ne?
Finansas, mitiga costo di bida, falta di hende pa labora despues di decisionnan descabeya cu construccionan di hotel, necesidad grandi pa inversion den cuido y necesidad di nos populacion cu ta experienciando un "vergrijzing" inmenso. Y nos lo no por lubida nos hobennan, pa sigura trabao pa esnan cu kier bin bek cas.

- Con bo ta haci comparti bo tempo entre politica y famia?
No ta facil; y como un mama independiente (soltera) mucho menos, pero mi ta purba t’ey mas cu mi por pa mi 2 yiu, famia y amistad. E sacrificio ta grandi y mi ta spera di curazon, cu un dia mi por laga atras un miho Aruba pa mi yiunan y cu nan lo por compronde mihor e motibo di e sacrificio aki.

- Politica tin su pro y contra, cua di esaki nan ta pa bo?
E pro ta cu mi ta haya e oportunidad pa yega na hopi hende y haci lo maximo pa mehora e calidad di bida di nos hendenan. E contra ta cu bo ta expone bo mes personalmente, sin lubida bo famia, na atakenan hopi baho di hendenan cu no por hiba un competencia politico riba nivel y profesional.

- Kico ta bo mensahe pa pueblo di Aruba pa e siguiente eleccion?
Nos ta na un punto cu Aruba mester un cambio di berdad y urgente. Nos no por keda den e mesun rutina aki, caminda pa añanan largo 2 partido a goberna sin cu por a wak un cambio di berdad pa e pueblo di Aruba. Aruba ta un pais rico, pero lamentablemente e entrada di e rikesa aki no ta yega na nos hendenan. Constantemente ta e pueblo ta sufri. Hubentud no tin un perspectiva. A bira tempo pa trece un cambio den esaki.

- Pakico Aruba mester deposita nan confiansa bek den bo y den bo partido?
Futuro ta un partido nobo, manera tur hende lo bisa. Pero si berdad nos kier un cambio, nos mester duna un partido nobo, cu vision pa Futuro, e oportunidad di bira grandi. Si nunca nos haci esaki y keda vota pa algo usual, algo di semper, nunca nos lo yega na e cambio asina anhela. Mi ta kere mi a demostra, durante mi tempo como politico y parlamentario, di ta para pa lo corecto. Mi no tin miedo di vocifera mi punto di bista, ni tampoco demostra esaki. Gerlien ta un hende cu ta kere den dialogo caminda tin diferencia di opinion, pero a base di respet, no insulto ni intimidacion y asina hunto yega na un solucion cu semper lo tin e persona, esta nos pueblo, y e isla di Aruba como prioridad.

- Como un di e parlamentario di mas hoben di nos pais y awo lider di bo mes partido, bo ta sinti cu Aruba ta cla pa duna mandato completo na un partido nobo?
Aruba ta anhela un cambio. Tin necesidad di politica cu ta crea oportunidad pa cada ciudadano y progreso colectivo. Politica cu ta enfoca riba crea posibilidad hunto cu stakeholders y comunidad henter pa asina prepara pa diferente scenario y reto cu nos por encontra. Nos comunidad henter ta cla pa uza nan voz, aporta na e crecemento di nos pais cu idea nobo y pa concretisa pasonan y trece cambionan hunto cu ta aporta na e desaroyo personal di nos cada un y e desaroyo colectivo di nos pais. Ta tuma curashi y perseverancia pa trece y stimula cambio. Curashi y perseverancia ta sigur cualidadnan cu nos cada un tin den nos, y esaki lo keda demostra dia 6 di december.

- Aruba tin confiansa den su politiconan? Y si ta no, kico por haci pa cambia esaki?
Mi ta kere cu si tin confiansa den nos. Mester pone enfasis si cu hopi ta rabia y disgusta cu e manera cu a hiba politica e ultimo decadanan. Mi no ta desea di bay den detaye. Pero si mi ta kere cu nos ta na tempo pa por drecha loke a wordo kibra. Duna oportunidad na esunan mas hoben den politica pa haci Aruba un pais prospero pa un y tur. Un pais cu futuro grandi.

- Mensahe final di Gerlien?
Mi tin fe den nos pueblo y ta kere den e grandeza di nos pueblo. Nos ta un pueblo cu pa decadanan a sa di adapta na factornan cu no tur ora tabata na nos favor. Sin embargo nos tin e boluntad tur dia pa lanta y sigui aporta na nos pais. Laga e forza aki ta esun cu lo hiba nos na scoge e espacio caminda e voz di nos cada un ta conta. Y e oportunidadnan pa nos cada un por wordo alinea na nos necesidadnan. Laga nos scoge e espacio caminda e crecemento di nos cada y hunto ta primordial. Laga e forza di nos grandesa ta e fundeshi di e cambio cu nos cada un ta merece y ta anhela. Mi ta convenci cu nos por yega na e punto cu e bienestar y prosperidad realmente lo yega den cada cas di nos hendenan y cu nos TUR por logra cosnan magnifico y significante pa Aruba. E momento a yega pa hunto nos ban crea e Aruba cu nos merece.

Team Ivo 4 Life ta desea Mr. Gerlien Croes y su partido Futuro tur clase di exito den eleccion dia 6 december 2024.