Rapper Sean ‘Diddy’ Combs, acusa cu mas di 120 cargo di agrecion sexual.

Un team di abogado a anuncia cu nan lo presenta mas di 120 demanda pa agrecion sexual contra e rapper Sean Combs, conoci como Puff Daddy den e proximo luna.
“E mayor secreto di e industria di entretenimento, cu en realidad no tabata un secreto, finalmente a ser revela na mundo. E muraya di silencio a kibra!’’, tabata comentario di Tony Buzbee, un di e abogadonan principal den un conferencia di prensa na Houston.

E acusacionnan aki, cu Combs ta nenga, ta bin despues di cu e rapper y magnante di musica a ser deteni na un hotel na New York dialuna 16 di september.
E victimanan ta inclui un cantidad di persona tanto hende homber como hende muhe, di cual nan edadnan ta varia entre 9 y 38 aña na momento di e atakenan.

Entre e victimanan ta inclui 25 menor di edad y e agrecionnan ta abarca un periodo di tempo di 20 aña den e decadanan di 2000 y 2010, ora Combs tabata den top di su fama.
E abogadonan a ricibi mas di 3.000 persona cu a presenta cu acusacionnan contra di Puff Daddy den e ultimo 10 dianan. Di tur, 120 di nan ta ser tuma den consideracion.
Ademas di agrecion sexual violento y abuso sexual, e abogadonan tambe ta plania pa acusa Combs di fasilita sex cu substancia controla, encarcelacion falso, difucion di grabacionnan di video y abuso sexual di menor.

E supuesto agresionnan a sosode principalmente na New York, manera tambe na Los Angeles y Miami, segun Buzbee. E la splica cu e casonan aki a sosode na lugarnan conosi manera hotel y residencianan priva. Hopi di nan na fiestanan di pasco, celebracionnan pa lansamento di album, casting y na e famoso fiestanan yama ‘White Party’ cu Combs tabata organisa regularmente na comienso di añanan 2000.
Combs tambe tabata organisa fiestanan sexual bou nomber di “Freak Offs”.

Segun e documentonan presenta den corte, e fiestanan aki tabata manipula victimanan femenino y trahadonan sexual masculino den actonan sexual mientras nan tabata ser intoxica. Durante e fiestanan aki Combs tabata masturba y graba e victimanan. 
Fiscal ta menciona cu e victimanan tabata ser entoxica cu substancianan durante e fiestanan pa asina por a wanta dianan "obediente y sumiso". Combs tabata "abusa di nan fisicamente, emocionalmente y verbalmente" pa nan acepta pa participa. Tin indicacion cu e victimanan tabata keda asina cansa despues di e sesionnan cu algun mester a ricibi awa di bida pa por a recupera di e esfuerzo fisico y uso di droga durante dianan.
Alrededor di 1,000 boter di baby oil y lubricante a ser haya den e casnan di Combs na Miami y Los Angeles.

Tambe Combs ta enfrenta otro acusacionnan manera "participacion den actonan di violencia, menasa di violencia, menasa di daño financiero y reputacion, y abuso verbal", incluyendo secuestro y incendio contra di testigonan de su supuesto abuso.

Abogado di Combs, Erica Wolff, a nenga tur acusacion contra di Combs. E la bisa: “Mi ta enfatisa cu e team legal di Sr. Combs, no por aborda cada acusacion sin fundamento cu a cambia y bira un circo di media imprudente. Sr. Combs ta nenga enfaticamente y categoricamente como falso y difamatorio, cualkier afirmacion di abuso sexual di un hende, incluyendo menornan di edad”.
Den luna di september e rapper a keda deteni na New York seis luna despues di cu autoridadnan Mericano a investiga su casnan na Los Angeles y Miami den marco di un investigacion di trafico sexual.