Transporte pa personannan cu limitacion ta bay ser kita: Famianan man na cabes.

​​

Cambio Drastico den Transporte pa Clientenan di SVGA – Un Apelacion Urgente na Ministerio
Un noticia cu a laga hopi mayornan preocupa: Stichting voor Verstandelijk Gehandicapten Aruba (SVGA) a manda un carta oficial cu un cambio importante den transporte pa clientenan cu ta asisti na centronan di: Man na Obra, Pasadia Briyo di Solo y Pasadia Bibito Pin.
Segun e comunicado, SVGA lo termina su contract cu e actual proveedor di transporte, AGW-Tours, pa final di juli 2025. Motibonan? Servicio cu “ta laga hopi di desea” y falta di cumplimento cu e standardnan cu SVGA ta exigi. E parti preocupante ta cu no tin un reemplaso na bista—y esaki ta pone e peso completo di transporte riba e mayornan y representante di e clientenan vulnerabel.

Realidad scur pa hopi famia:
For di augustus 2025, famia lo mester paga e costo completo di transporte. Actualmente cu AWG-Tours, esaki ta 320 florin pa luna pa cliente—un gasto cu te awor tabata parcialmente cubri pa gobierno (Awg 170,00). Pa hopi mayornan sin transporte propio of recurso extra, esaki no ta solamente un stress financiero, pero un menasa real pa bienestar di nan ser keri.

Hopi di e clientenan tin necesidadnan special: uso di rolstoel, limitacion den mobilidad, y necesidad di asistencia durante e transporte... Sin un transporte adapta, nan no por yega na nan centro. E consecuencia? Interupcion den rutina, desaroyo y cuido cu nan ta depende riba dje.

Un yamada pa ministerionan:
Via nos plataforma, nos ta manda un apelacion formal na Minister Mervin Wyatt Ras (Asunto Social) y Minister Wendrick Cicilia (Transporte) pa tuma nota urgente di e situacion. E clientenan vulnerabel di Aruba merece un solucion humano y sostenibel. SVGA mes a purba haya otro alternativa, pero sin exito te awor.
Pa keda sigui cu e cuido cu nan mester y merece, un man di yudansa necesario. E mayornan no ta pidiendo un milager—nan ta pidi yudansa y un gesto di solidaridad.

​

Carta cu mayornan a ricibi: