Personahe di siman: Yinneth Arache, inspirando muhernan pa bira un mihor version di nan mes. 

​

Yinneth Arache Melo, ta un muher fuerte, cu ta inspira otro y ta determina cu trabouw duro, pasion y fe den bo mes, tur cos ta posibel. E la nace na Santo Domingo, ora e tabata tin 9 aña di edad e la inmigra pa Aruba. for di chikito Yinneth tabata demostra cu e tabata tin hopi talento y energia. Ora e tabata mas hoben e la participa den e grupo di baile Popcorn Dancers, unda e la cuminsa desaroya su pasion pa baile, cu tempo e pasion aki a sigui crece te ora cu e la bira un bailarina profesional, usando su talento pa inspira otro hende. 

​

Yinneth su compania di cabey krul ta un refleho di su pasion pa beyesa natural y empoderacion di hende muher. Bibando na Aruba Yinneth a ripara cu hopi hende cabey krul no semper sa con pa cuida nan cabey of sinti nan mes sigur di nan propio cabey. Esaki a inspira Yinneth pa lanta su negoshi (Ricciolibyyiyi), unda cu e ta yuda hende cu nan cabey y con pa trata nan cabey cu amor, pasenshi y cu e productonan adecua. Yinneth ta gusta comparti su conocemento y experencia pa motiva e hende muher sinti su mes sigur. Su meta ta pa sigui crece den e area aki y inspira e hende muher cu cabey krul pa biba cu mas confiansa den nan mes.

​

Ademas di esaki, Yinneth ta un mama orguyoso di su yiu homber (15) y su yiu muher (12), su yiunan ta su motivacion di mas grandi, e ta traha duro pa mustra nan cu den bida bo mester sigui bo soñonan y no rindi nunca. Gym ta un parti hopi importante den e bida di Yinneth, ademas di traha riba su propio salud e ta motiva hende pa move y keda activo, segun Yinneth un bida activo den gym por cambia hopi cos, no solamente fisicamente pero tambe mentalmente. 

​

Combinando su bida di mama, negoshi, pasion pa baile y su dedicacion na gym, Yinneth ta mustra cu balans y determinacion den un persona por logra hopi cos den bida. Su meta ta pa inspira e hende muher pa cuida nan mes y pa kere den nan forsa y pa lucha pa un bida mas saludabel. 

​

​

​

​

​

 

​

​​