​

Tanisha Scharbaay, un hoben di 25 aña, ta bibando ya pa 4 aña na Den Haag, Hulanda. El a lanta den un famia musical. Na 2017 Tanisha a obtene su diploma di MBO na EPI den Hospitality & Tourism. Tanisha ta un persona hopi social, pero na mesun momento, e stima ta su so na cas ta wak pelicula, video di Youtube of scucha musica, bon compaña cu un glas di biña. Tanisha ta feliz di por tin e oportunidad di expande su network, siña e cosnan nobo y biaha rond di mundo. 

 

Entre Tanisha su logronan di mas grandi ta: gradua MBO na 2017, cumpli cu su soño di sali reina y bay biba na Hulanda pa continua cu su estudio. Na 2015 Tanisha a competi pa eleccion di reina di EPI representando e sector di Hospitality & Tourism, cual el a gana y asina el a dicidi di bay participa na eleccion di Reina Grandi di Aruba su Carnaval 61. Aki el a logra bay cu e premionan di: Best Speech, Best Costume, Queen of MAS, Mas Popular y sin lubida e titulo maximo: Reina di Aruba su Carnaval 61.
 

Actualmente Tanisha ta studiando International Creative Business, cu ta un estudio relativamente nobo. Antes e tabata carga un otro nomber y e structura tabata diferente. E ultimo 4 aña el a bira un estudio hopi mas "hands on", nificando cu e studiantenan ta traha directamente cu cliente durante cada blok y ta haci hopi investigacion y trabou den grupo. Ora cu Tanisha caba cu e estudio aki, e por bay den e direccion di comercio/negoshi, den por ehempel: mercadeo, manager etc. Tanisha a dicidi di scohe e estudio aki, pa asina e por tin un bista di cada sector y asina descubri loke mas e ta gusta.Actualmente e parti di mercadeo ta halando su atencion hopi, specialmente e direccion di mercadeo y social media. 

 

 

“No tur ora ta facil, pa combina scol, trabou y gym”.

​

Den su tempo liber e ta gusta ta na cas, wak un bon serie, train kickboxing, cushina y inventa cos nobo p’e come. Door cu Tanisha ta hopi activo riba social media, principalmente Instagram (tanishaa.xo), e ta tuma tempo y atencion pa pensa ki contenido e publica riba su social medianan. E ta purba ilustra un tiki di su bida, ‘the highs and the lows’ y alabes motiva y inspira esnan cu ta siguie. Sinembargo Tanisha tin un pagina nobo tambe riba Instagram (tanisha.approved), unda e ta comparti su experencia den F&B y su amor pa cuminda y bebida. Un aventura gastronomico nobo a nace, unda Tanisha ta bishita diferente restaurant of cafe y ta 'rate' nan cuminda, pero tambe bebida, ambiente y servicio. 

​

“Nunca Dios lo duna bo un carga cu e sa bo no lo por carga. Sea fuerte y semper positivo, no ta tur dia ta mesun facil, pero cu e hendenan corecto rond di bo, bo por logra hopi mas! Si tin dia mas fuerte cu otro y bo ta sinti cu bo no por handle e bo so mas, no tene miedo di busca ayudo profesional. Si abo tin un meta cu bo kier yega na dje, traha riba esaki. Tur hende a cuminsa un caminda. Kere den bo mes y bo vision, bo lo logra”.