Centro Famia di Criansa Arubano (CFCA): Cuido temporal cu impacto duradero. 

​​

Centro Famia di Criansa Arubano (CFCA) t'e instancia na Aruba cu ta encarga cu tur asunto relaciona cu cuido di criansa. E organisacion aki a ser lanta dia 3 di juni 2004 pa varios partner importante, manera Fundacion Guia Mi, Voogdijraad, Departamento di Asunto Social, Stichting Verstandelijk Gehandicapten Aruba, Casa Cuna, Kinderhuis Imeldahof y Centro Orthopedagogico (antes conoci como Cas pa Hubentud).

​

CFCA tin como meta pa informa, prepara y registra famianan di criansa, Tur famia interesa ta pasa door di un proceso di screening profundo pa evalua nan situacion, backround y capacidad, pa asina garantisa cu nan por ofrece un ambiente seguro y stabiel pa un mucha. Despues cu e proceso aki ta completa, CFCA ta match e famia cu un mucha cu ta den necesidad di cuido. 

​

CFCA ta busca famia di criansa pa muchanan entre 0 (dus baby) te cu mucha di 18 aña. Ora nan haci 18, nan ta mayor di edad. 

​

Personanan interesa por scoge entre diferente tipo di cuido di criansa:
   •    Famia pa weekend of vakantie
   •    Famia di crisis (pa situacion urgente y inespera)
   •    Famia pa temporada cortico (maximo 2 aña)
   •    Famia pa temporada largo (mas cu 2 aña of inclusive        permanente)
   •    Famia pa muchanan cu limitacion
   •    Big brother of big sister pa hoben

​

Importante pa compronde cu cuido di criansa no ta igual cu adopcion. Cu cuido di criansa ta un solucion temporal, unda un mucha ta wordo coloca den un famia of institucion mientras su mayornan biologico ta ricibi guia y apoyo pa mehora nan situacion. Un instancia competente of un hues ta determina si y ora e mucha por bolbe cerca su famia original. Adopcion, na otro banda, ta nifica cu e mucha ta bira legalmente bo yiu, y tur laso huridico cu e mayornan biologico ta wordo termina.

​

​